Nr 17: Losun innan ETS í umsjón Íslands fyrir árið 2021
Umhverfisstofnun birti í síðustu viku uppgjör losunarheimilda í ETS kerfinu fyrir árið 2021 en heildarlosun innan ETS kerfisins sem er í umsjón Íslands var 2.111 kt CO2-íg. Þetta er annars vegar iðnaður fyrir alþjóðamarkað sem er staðsettur á Íslandi, og hins vegar flugfélög með flugrekstur sinn skráðan á Íslandi.
Þar af var losun frá staðbundnum iðnaði 1.844 kt CO2-íg og hefur aukist síðan 2019:
Heildarlosun allra rekstraraðila í staðbundinni starfsemi innan ETS kerfisins í Evrópu var 1.311.000 kt CO2-íg árið 2021 (1,31 Gt CO2-íg) sem var samt u.þ.b. 4,4% samdráttur miðað við 2019.
Losun frá flugferðum sem eru í umsjón Íslands og eiga sér stað innan EES svæðisins og Bretlands (þ.e. t.d. ekki Ameríkuflug) var 267 kt CO2-íg árið 2021 sem er ennþá töluvert minni en losun ársins 2019.
Heildarlosun allra flugrekanda innan ETS kerfisins var 26.600 kt CO2-íg árið 2021 sem er 61% minna en losun ársins 2019.
Við óskum lesendum Grænlands góðrar skemmtunar á Ok, bye á morgun, miðvikudag. Jóhann og Kristinn verða þar, endilega heilsið upp á okkur ef þið sjáið okkur í Hörpu.
Ef einhver sendi þér þetta, smelltu á þá „Subscribe“ til að skrá þig. Endilega sendu áfram ef þér finnst þetta áhugavert. Einnig er hægt að lesa fyrri greinar.
Þetta helst
⚡️ SNERPA Power og Landsnet undirrituðu viljayfirlýsingu um tilraunaverkefni þar sem hugbúnaðarlausn SNERPA Power verður notuð til að tengja stórnotendur með sjálfvirkum hætti við jöfnunarorkumarkað Landsnets. Hugbúnaðarlausn SNERPA Power sjálfvirknivæðir einnig ferla fyrir álagsáætlanir og tilboðsgerð. Jöfnunarorka er sú orka sem Landsnet verður að hafa til reiðu til þess að jafna mismun sem getur orðið á raforkuframleiðslu og notkun í rauntímarekstri. Verðið á slíkri jöfnunarorku er hægt að sjá á vefsíðu Landsnets, brotið niður á klukkutíma en sem smá dæmi var meðalverð á jöfnunarorku:
🏠 Hampfirma ehf. undirbýr byggingu fyrsta hampsteypuhússins á Íslandi en samkvæmt Paul Lukas Smelt, verkefnastjóra hjá Hampfirma, mygla slík hús ekki og geta verið kolefnisneikvæð. Byggingaraðferðin er vel þekkt í Evrópu en íslenskar veðuraðstæður eru óhagstæðar og því þarf frekari rannsóknir áður en hampsteypan verður mikið notuð hér.
🔬 Stjórnarráðið auglýsir eftir umsóknum um styrki í Doktorsnemasjóð umhverfis-, orku- og loftslagsráðuneytisins til rannsókna á samspili landnýtingar og loftlags. Frestur til að skila inn umsóknum er til 15. júní 2022, kl 15:00.
🙃 Við erum vægast sagt ósammála VSÓ Ráðgjöf að það sé nóg að planta nokkrum basilíkufræjum til að kolefnisjafna ferð sína til þeirra - nema þau mæli með því að komið sé fótgangandi.
Annað sem við lásum
😞 Hræðileg hitabylgja liggur yfir Indlandi og Pakistan og börn eru meira en helmingur þeirra sem þjást af hitaslagi eða öðrum hitastigstengdum kvillum. Sherry Rehman, loftslagsráðherra Pakistan, varaði við skyndiflóðum vegna þess að jöklarnir í norðurhluta landsins bráðna á ógnarhraða. Gróðurhúsalofttegundirnar sem valda slíkri hitabylgju koma að mestu frá Bandaríkjunum, Evrópu og á síðustu árum Kína.
🤖 NVIDIA þróar ofurtölvu til að geta keyrt miklu nákvæmari loftslagslíkön en áður og geta spáð fyrir um áhrif loftslagsbreytinga á smærri svæðum.
🔥 Nýtt kort sýnir nákvæmar en áður hvar hætta er á skógareldum í Bandaríkjunum:
❄️ Góð grein í Nature sýnir hvernig afskekkt norðurslóðasamfélög treysta á jarðefnaeldsneyti þrátt fyrir að það sé flókið og dýrt að koma því á staðinn. Greinin sýnir einnig hversu mikilvægt það verður að tryggja að afskekkt samfélög (jafnvel eins og Ísland) séu sjálfbær og geti meðal annars viðhaldið og aðlagað þá tækni sem kemur í staðinn fyrir jarðefnaeldsneytisbruna.
⚖️ Þingfólk í Bandaríkjunum er byrjað að leggja fram frumvörp sem skilgreina hvernig stjórnvöld muni borga fyrir að fjarlægja kolefni úr andrúmsloftinu. Federal Carbon Dioxide Removal Leadership Act leggur til að greiddir verði $9,6 milljarðar á 12 árum. Annað frumvarp frá New York fylki leggur til að aðgerðir verði fjármagnaðar með því að draga úr ívilnunum á þotueldsneyti og þá muni sá sem mengar greiða fyrir mengunina. Eiga vegagjöld á Sundabraut að greiða fyrir kolefnisförgun úr andrúmsloftinu?
🤷♂️ Getur einhver útskýrt af hverju brennsla viðarköggla er merkt sem kolefnishlutlaus?
♻️ Að láta hringrásarhagkerfið ganga upp er töfrandi áskorun. Sveitarfélagið Kamikatsu í Japan er fyrirmynd sem hægt er að læra af.